नशा आशेत वसताना टिके आशा नशेपोटी
अशा आयुष्यभर बसतात अन् टिकतात निरगाठी
कधी छळछावणीच्या यातनेमध्ये टिके आशा
कुणाला थोडके अपयश पुरतसे शेवटासाठी
भले पुरती करे फसगत तरी उरते खुळी आशा
कितीही भंगली स्वप्ने तरीही झिंगण्यासाठी
कुणाला फक्त दुसऱ्याच्या निराशेची असे आशा
कुणी लपवी निराशा फक्त दुसऱ्याच्या सुखासाठी
सदोदित एकटा अन् हासरा संन्यस्त ही प्रतिमा
छुपी असते निराशा जीवघेणी मात्र सांगाती
प्रवासाला करावी नेहमी सुरुवात आशेने
निराशेच्या व आशेच्या पलिकडे पोचण्यासाठी
- निलेश पंडित
६ जानेवारी २०२२
कोणत्याही टिप्पण्या नाहीत:
टिप्पणी पोस्ट करा