दाद

दाद असावी खुली...प्रवाही...
रसिकत्वाचा जणू धबधबा
निर्मलतेने करीत जावी
कलाकृतीची द्विगुणित शोभा

दाद असावी स्पष्ट नेमकी
कलाकृतीची पुढिल पायरी
सूर, रंग वा क्रिडा असो...वा
अन्य कशाची लज्जत न्यारी

जशी कोठल्या रत्ना कोंदण
दाद दिसावी कृतीभोवती
कलाकारही सुखे फुलावा
अधिक स्फुरावी कलानिर्मिती

दाद नसावी वरवर...व्हावी
सुखावणारी अंतरातही
कृतकृत्य हो कलाकार पण...
उजळविणारी रसिकत्वाही !

- निलेश पंडित
२८ मे २०१२