पणती

(वृत्त: पादाकुलक)

नकोत टेंभे नकोत पलिते
हवीहवीशी वाटे पणती
अखंड तेवे आवाजाविण
केवळ थोड्या तेलावरती

सणासुदीच्या दिवसांमध्ये
चालू असता आतषबाजी
कोपऱ्यात वा कठड्यावर ही
संतत जळण्या सदैव राजी

भले असो ती शांत एकटी
एकलकोंडी नसते पण ती
फुलबाज्या… शेकडो फटाके
हिच्यामुळे पेटती झळकती

थकलेले जग झोपी जाते
अंधाराचे राज्य पसरते
शेणाने सारवल्या भूवर
प्रज्वलीत ही प्रकाश धरते

हूं किंवा चूं कधी न करता
जळते आणिक विझते पणती
रात्र संपता सोडुन सर्वां
प्रकाशलेल्या सुरम्य जगती


- निलेश पंडित
२० एप्रिल २०१३