दगा

(जाती: नववधू)

का मनासारखा दिवस न ये?
जग रुक्ष मला वाटे सखये …

चांदीचे सजले जरि पेले
बहुमद्यांनी फसफसलेले
सुगंधीत अन रसरसलेले
…… ना मोहविती पण ती पेये (जग रुक्ष मला … )

स्वप्ने माझी आता नुरली
नको मला त्या सभा मैफिली
यशकिर्तीची हौसच फिटली
…… निष्प्रभ झाली सगळी वलये

मी कधीच नव्हतो संसारी
तू झेललीस दुःखे सारी
झिजलीस नेहमी परोपरी
…… नेत्री ठेवुन माझी ध्येये

तू दगा एक केलास परी
अवचित सोडुन मज संसारी
परतुन येशिल का तुझ्या घरी …
…… एकदा - फक्त एकदा प्रिये?


- निलेश पंडित
२९ मे २०१३