माझी अत्तराची कुपी
तीत गूढार्थाचा गंध
आणि भावनांना करी
शब्दार्थाशी एकसंध
कधी शब्दांना ती देई
नव्या अर्थाचा सुवास
कधी रुंजी घालणारा
दरवळे अनुप्रास
क्वचितच उग्र दर्प
लाभे त्याला झोंबणारा
बाकी निशिगंध मंद
रात्र रात्र लांबणारा
आहे शारदेचा ठेवा
माझी अत्तराची कुपी
माझ्या मनोविश्वा करी
सावकाश सर्वव्यापी
माझा श्वास माझा भास
कुपी जतन करेल
शब्दांच्या कस्तुरीतून
पीयूष गंध उरेल
- निलेश पंडित
१२ जून २०१४
कोणत्याही टिप्पण्या नाहीत:
टिप्पणी पोस्ट करा