विस्तार

काही न सांगताही तू सांगतेस सारे
म्हणतेस त्यात वरती "समजून घेत जा रे"

नात्यास गूढ आहे विस्तार लाभलेला
नाविन्य खास ह्याला नसती कुठे किनारे

स्मितहास्य नेहमीचे वर लाजणे जरासे
सारी अशीच भाषा सारे असे इशारे

हलकाच स्पर्श झाला तोही तुला न कळला
फुलवून मात्र नकळत गेलीस तू निखारे

लाजून मागताना लटके 'नको' कशाला
आणू कुठून असल्या डंखांस मी उतारे

उपचार बंधने तू जप वागण्यात सारी
ह्रदयांस जोडणारी खोदीत जा भुयारे

- निलेश पंडित
१६ मे २०१६