तपस्या

(वृत्त: स्रग्विणी)

शोभते का तुला हे असे वागणे?
मूक होकार अन् दूरही राहणे

जाणतो मी जुना सूक्ष्म कावा तुझा
मी तुला पाहता पाहणे टाळणे

त्रस्त मी अल्पसंतुष्ट तू नेहमी
सज्ज देण्यास मी तू न ते मागणे

वेदना सारख्या पद्धती वेगळ्या
स्वप्न मी पाहणे रात्र तू जागणे

सभ्यता पाळुनी आत अस्वस्थ तू
का अशी देत जातेस तू कारणे?

शक्य होते कशी ही तपस्या तुला
अल्पसे भोगता खूपसे त्यागणे

- निलेश पंडित
२८ आॅगस्ट २०१६