क्षुद्र

तपे लोटली ...

माफक पण नेमके शब्द वापरून जेव्हा
विचारले मी
जरा चाचरत

क्षणभरात अन्
रोखठोक "नाही"च तरी ते
फेकलेस तू
हसून छद्मी
अंगावरती

... आणि कास धरलीस पुढे तू
सुजलेल्या बेगडी जगाच्या
फसफसणाऱ्या उत्कर्षाची

पुरती क्षुद्रच
ठरलीस जशी
तसे लगोलग
दीर्घकाळ मी
तुझ्या नि माझ्या
आठवणींना
कोपऱ्यातल्या
अडगळीत पण
नेहमीच जपलेले होते
(शक्यच नव्हते काही दुसरे!)
सन्मानाने

... काल अचानक
जेव्हा मी वाचली बातमी
तुझ्या नशेच्या गर्तेमधल्या
खंगत खुरडत जगण्याची पण
अजूनही बाहेर नेहमी
पैसे उधळत
लखलखाट पांघरून वरवर वावरण्याची
तगमगण्याची तडफडण्याची ...

तेव्हा का उमटली सुप्तशी
खोल मनाच्या
गाभ्यामध्ये
आनंदाची लहर अचानक
जरी चेहऱ्यावरती माझ्या दिसली नाही

क्षुद्र नेमके
कोण ... मनाला
कायमचे हे कोडे आहे
पडले आता


- निलेश पंडित
१६ जून २०१८