पिच्छा

 

बोजड जगण्याचे अवघड समोर ओझे

गतकाळामधल्या फुटकळ असफल इच्छा

आशेची अविरत पखरण स्वप्नांवरती

पुरवते ... भूक भागताच ... लज्जत पिच्छा

एकटा स्वताला नकळत एक समजतो

तर कधी घटक कोणत्यातरी समुहाचा

त्यातही त्यास उपजत हा समज न समजे

अंतरंग आविष्कारच अदृश्याचा

भय आणि कुतूहल नवीन काही दिसता

बदलाच्या जोडीसच स्थैर्याची आशा

उमगणे न संभव अशी छबी जगताची

निपजते स्वताच्या नकळत आत निराशा

होकार नकारा मधे अडकलेला तो

त्याच्यात तसा जो तसाच तो माझ्यात

नाकारा स्वीकारा लपवा वा सजवा

हा दिसतो "मी", "तू", "ती", "तो" ह्या सर्वांत

- निलेश पंडित

२० नोव्हेंबर २०२१