जथा

 

तुझी माझीच नाही हीच सर्वांची कथा आहे

जरासे वेगळे नसणेच सर्वांची व्यथा आहे

विलसतो चेहऱ्यावर नेहमी उत्साह सर्वांच्या 

तरीही आत लपलेली सदोदित भयकथा आहे

नद्या सर्वत्र आता वाहती श्रद्धा नि भक्तीच्या

इथे तर्काविवेकाचा घडाही पालथा आहे

शिखर गाठायला जातात तुरळक पालखीमधले

नशीबी सर्व भोयांच्या पुढेही पायथा आहे

विखुरलेलेच दिसती नेहमी सारे जथे येथे

तरी एकाच मार्गावर जथ्यांचाही जथा आहे

- निलेश पंडित

१२ मार्च २०२५