उठाठेव

शंकित मनाची   दीर्घ उठाठेव 

हीच एकमेव   नित्य क्रिया 

बाह्य ओढाताण  तशी आंतरिक 

प्रसंगा गणिक   खटाटोप

गोतावळा सारा  पसरे भोवती

त्यात नातीगोती  गदारोळ 

दरी किंवा भिंत  भयाण गवसे

पूल जेथे भासे  आधी मना

गढूळसे पाणी   तृषार्त जीविता

ओंजळ भरता  दिसतसे

सौंदर्याचा ध्यास  अथांग पसारा 

शोध घेणे सारा   वैफल्यात

कोलाहलात ह्या   मंजूळ सुस्वर

पडे कानावर  कोठूनसा

धूळ स्थिर साचे   तळाशी पाण्यात

तहान क्षणात   भागतसे

शुष्क कंठा भासे  अमृताचा स्पर्श 

वैफल्याचे पाश   सैलावती

नवनव्या वाटा   दऱ्यांत दिसती

कवाडे लाभती  भिंतींमध्ये

- निलेश पंडित 

२५ मार्च २०२५