कलम

कलम

मनात माझ्या कलम लावतो आस्तिकतेवर नास्तिकतेचे
फळे राखण्या बांधित जातो पेटारे अन् सात्विकतेचे

विज्ञानाच्या विश्वामध्ये अज्ञानाची देतो ग्वाही
श्रद्धेच्या मार्गात राखतो निर्णय-क्षमता खुली प्रवाही

संस्कृत-प्राकृत समान आणिक विवेक मजला प्रधान वाटे
"शरणागत व्हा" कोणी म्हणता, संशय माझ्या चित्ती दाटे

परंतु करिता नामसाधना, सुखावतो मी नित्य जरासा
विचार मंथन होता जाचक, भक्ती देते स्वास्थ्य...दिलासा

सकस तसे हिणकस ही पैलू दोहोंमध्ये मज आढळती
कमतरता एकीत भासता, दुजीकडे मम डोळे वळती

देव नसो वा असो कसाही, बाह्य जगी मी शोधित नाही
अथांगता जी वसे अंतरी, गवसेना ती दिशांत दाही

- निलेश पंडित
१९ जुलै २०१२