फिदा

फिदाच होतो कधी तुझ्यावर, मुग्ध असे त्या हसण्यावरती
आता जडली प्रीत तुझ्या या...जगात माझ्या...असण्यावरती

आठवते ती छबी आजही, आठवतो तो अवखळ रुसवा
जीव गुंततो आज तुझ्या पण संसारी समरसण्यावरती

चोखंदळ तू...तुझ्या आवडी...हट्ट तुझे ते होते अवघड
परंतु आता तुला चाहतो, कुठेच त्रागा नसण्यावरती

लग्न गाठ मी बांधत असता, व्यवहाराला पक्का होतो
मी जिंकावे म्हणून आता, उदार तू का फसण्यावरती?

अवखळ प्रेमाची ती खळखळ, पहिल्या प्रेमातच विरघळली
सखोल आता प्रेम आपले, एकच होउन वसण्या वरती

- निलेश पंडित
१८ जुलै २०१२