पालवी

दरवाजाच्या सूक्ष्म फटीतुन नेत्र पल्लवी व्हावी

दोन दिलांची गाठ पडावी सृष्टी हिरवी व्हावी

भले पुन्हा जा झिडकारुन तू ...वाट तुझी मी पाहिन
पुन्हा भेटण्या तुझी जुनी ती खेळी फसवी व्हावी

लोकांमध्ये अफवा होती, कोण फसवते कोणा
मला मिळावा आळ...वाटते...तुझी थोरवी व्हावी

अल्प क्षणांची साथ मिळावी...उरले क्षण जगण्याला
तुझी साथ वठल्या झाडाला जरा पालवी व्हावी

'पंडित' आता जरी आळवी राग रागिण्या सा-या
मैफिलीत माझ्या पण अंती तुझी भैरवी व्हावी

- निलेश पंडित
९ ऑक्टोबर २०१२