दोघे

एका घरात दोघे जण
एक वृद्ध आणि वृद्धा
तासन् तास शांतता
सुसंवाद तरीसुद्धा...
आजोबा खोकतात
आजी वळतात
"काय झालं...!" बघण्यासाठी
सुरकुतल्या कपाळी
दिसते चिंतेची
एक आठी
आजोबांच्या जेवणाचं
आजींनाच जास्त भान
जणू कोणी मूल लहान
आणि त्याची
भूक तहान

निःशब्द शांततेत
निर्व्याज व्यापार
अस्तिस्त्वाच्या बदल्यात
ऊब...माया...अपार

वार्धक्याच्या वाळवंटी
नाती अशी सजतात
पाहता पाहता डोळ्यांच्या
कडा आपसुक भिजतात

- निलेश पंडित
६ मार्च २००८