मखलाशी

माथ्यावर आकाश फुटावे
आम्हा नाही काही चिंता
केले ना तू मर्त्य अम्हाला?
घे दर्पोक्ती ऐकुन आता...

असे नसे की निर्भय झालो
अथवा झालो समर्थ आम्ही
कळले आता एक फक्त की
गूढा लोटांगणे निकामी

समोर आम्हा अनेक दिसती
तुला पूजिती परि तळमळती
बोटे मोडित नशिबाला मग
पूजेनंतर अश्रु ढाळती

म्हणून जाणुन घे मखलाशी
अम्हा मानवांना सुचलेली
आम्ही बनतो देव स्वघोषित
नाडाया जनता पिचलेली !


- निलेश पंडित
३१ ऑगस्ट २०१२