विरोधाभास

काळ्या पांढ-याचा खेळ
त्यात उष्ण शीत मेळ
कुणा आजन्म दारिद्र्य
कुणा श्रीमंती निर्भेळ

कुठे घट्ट गाठ-साथ
दुष्काळाला भूकंपाची
क्रूर शक्तींना लाभते
खाण सोन्याची रुप्याची

सा-या सा-यात समान
विरोधाचा हा पदर
काय किमया रे तुझी !
द्वैती अद्वैत सुंदर !

रिझवतो मीच माझ्या
जरा मनाला माफक
आणि समाधाने गातो
देव दानव रूपक

समजावतो स्वतःला
सारे मिथ्या नि नश्वर
डोळयांसमोर अंधारी
मनी "ईश्वर...ईश्वर"


- निलेश पंडित
२१ नोव्हेंबर २०१२