ही…तीच पायरी
…
…
… हीच ती पायरी
जी चढून
उंबरठा ओलांडून
भरलं माप सांडून आत
मी आले घरात
एका सोनप्रहरी
लख्ख उन्हात
रेखीव रांगोळी पहात पहात
उन्हं प्रखर झाली
… आणि उतरली
रांगोळी विस्कटली
हळू हळू विरली
अचानक कुठूनसा
उंब-या बाहेरून
थंडसा शिडकावा आला
… आणि तो धुंदसा तुझ्या अत्तराचा दरवळ …
सोबत घेऊन तुझ्या
जुन्या मोहक रांगड्या स्पर्शाला
पायरीवर आली थोडी ओल
वाटलं साधावा
एक नवा समतोल
नाही … नाही कळलं
कधी साचलं शेवाळ
… झाली पायरी निसरडी
भरलं माप गहाळ
________________
पण आता पुन्हा फटफटलंय
झालाय सोनप्रहर पुन्हा एकदा
मी ऐकतीय आता
पक्षांचा गोड किलबिलाट
जो पूर्वी कधी ऐकला नव्हता ….
- निलेश पंडित
११ एप्रिल २०१३
कोणत्याही टिप्पण्‍या नाहीत:
टिप्पणी पोस्ट करा