खरंच सांगतो
विश्वास ठेवा
कोणत्याही संस्कृतीला
वाटावा हेवा
एवढे होते
पूर्वज महान
संस्कृती महान
ग्रंथ महान
आपल्या पिढ्या कुचकामी
आपण सारे फार लहान
काय म्हणता?
याला नाही आधार… ?
अहो - भरून वाहतंय
ग्रंथ भांडार !
काय म्हणता?
त्यांतील लिखाण नाही स्पष्ट?
साधी बाब घ्या समजून
रहस्य घ्या उमजून
मतितार्थ लावण्याचे
वाचकाने करावे लागतात कष्ट !!
काय म्हणता?
शब्दकोषा नुसार
रूढ शब्दार्थ होतात वेगळे?
अहो - इथे भावनेने
संदेश बदलतात सगळे !!
काय म्हणता?
येत नाही पटेल अशी प्रचीति?
वाढवा साधना… अन
…उपासना जरा …
आणि पुनर्जन्माची महती
ठसवून घ्या जरा चित्ती !!
काय म्हणता?
आता सारं बोलणंच खुंटलं?
खुंटलं ना?
अहो - असंच हे महत्व
पूर्वीच्या पिढ्यांना पटलं!
बघा - बोलण्याच्या नादात
कसं हरवलं तुम्हाला वादात
का घेता विनाकारण
मोठा घास तोंडी लहान!
अहो - आपले पूर्वज महान
आपली संस्कृती महान!!
- निलेश पंडित
५ ऑगस्ट २०११
कोणत्याही टिप्पण्या नाहीत:
टिप्पणी पोस्ट करा