भार

(वृत्त: अनलज्वाला)

अज्ञानाचा भार वाहती अनेक प्राणी
नव्या युगीही गात राहती जुनीच गाणी

पाश्चात्त्यांना सुद्धा त्यांची चूक उमगली
अम्हा वाटती परंतु प्यारी तीच घराणी

समता आणिक सहिष्णुता ही तत्वे - मग का -
मुंग्या साखर करती गोळा … खाई राणी ?

भर दुष्काळी विहिरीसाठी कर्ज काढता
इथे तोंडचे शेतकऱ्याच्या पळते पाणी !

दारिद्र्याच्या रेषेखाली वाढे संख्या
देश मिरवतो नवनवीन पैशाच्या खाणी !

अन्न, वस्त्र इत्यादी गरजा नंतर पाहू
आधी जपुया परंपरा - संस्कृती पुराणी

न्यायदेवतेच्या डोळ्यांवर आहे पट्टी
तोवर चिरडा गोरगरीबांची गाऱ्हाणी !

- निलेश पंडित
१६ एप्रिल २०१३