शैशव

(वृत्त: मनोरमा)

सर्वव्यापी शैशवाची
सूक्ष्मता अन् गूढ खोली
लाभल्याने वाळवंटी
रात्र थोडी … मात्र ओली

भग्नतेला भूत देई
डिंक खोट्या आर्द्रतेचा
त्या खऱ्या 'खोटे' पणातच
सूर लाभे एकतेचा

तोंड होते बोळके अन्
सुरकुत्या पडतात गाली
त्यांतही वार्धक्य बोले
बोबडी शृंगार बोली

मानवाच्या वृद्धतेला
मर्त्यतेची कृष्णरेषा
बाल्य भूतातील पेरी
त्यांतही समृद्ध भाषा


- निलेश पंडित
४ मे २०१३