हा ब्लॉग शोधा

शुक्रवार, २८ जून, २०१३

उत्क्रांती

(वृत्त: भूपती)

ही कृष्णधवल विषमता जगी का मुरते?
मुरताना कुजते आणि मनी चुरचुरते
… अंगार बरसत्या नजरा करती पृच्छा
"का सौख्य तुम्हाला… आम्हा बाधा उरते?"

जे कानी पडती तऱ्हेतऱ्हेचे बोल
वचने ती अंती ठरती मातीमोल
… खेळणी असावे धूर्तां हाती कोणी
हे नशीब त्यांचे? … बाकी सारे फोल?

पण युगायुगांचा जोर दयाळू फार
तो लुळ्या करांना शिकवी करणे वार
… सुरवंटासम लढण्या देई तो शक्ती
देण्यास पिढीला नव्या नवा आकार

त्या उत्क्रांतीचा भाग होउया आता
या … लिहू तमावर प्रकाशदायी गाथा
… नजरेतिल अंगारांचे बनवू तेज
अवघ्या जगताचा उन्नत राहो माथा


- निलेश पंडित
२८ जून २०१३

कोणत्याही टिप्पण्‍या नाहीत:

टिप्पणी पोस्ट करा