शूळ

(वृत्त: स्त्रग्धरा)

भावांच्या शब्दमाला अमित रचित मी प्राप्त केली प्रसिद्धी
वृत्ते सारी शिकूनी अविरत लिहिता लाभल्या शब्द सिद्धी
वैविध्यातून काव्ये बहुरसमय जी नित्य साधीत गेलो
जे भावे वाचकांना सतत श्रमत मी त्यांत बांधीत गेलो

अश्रू मोठे बघावे ... रुदन बघत ते काव्य निर्मीत जावे
आनंदाच्या क्षणीही समरसत स्वतः हास्य शब्दी भरावे
शौर्याच्या थोर गाथा सळसळ रुधिरी जागवीती विराट
आकांताच्या तशा त्या खळबळ हृदयी माजवीती अफाट

साहित्याच्या सभांना नियमित असणे नेहमी शक्य केले
उच्चश्रेणी जनांचे बहुमत मिळणे नेमके साध्य झाले
कष्टाने प्राप्त झाली सुखमय वलये सौख्य संपत्ति सारी
झालो ऐसा यशस्वी जन मज म्हणती "थोर गाढा विचारी"

लोकांच्या भावनांची घुसमट बघणे शुष्कसा खेळ झाला
आनंदे हासता मी अवचित हृदयी तीक्ष्णसा शूळ आला


- निलेश पंडित
२७ जुलै २०१३