प्रस्तुती

(वृत्त: कालगंगा)

प्रस्तुती ना राहिली आता जुगारांसारखी
एक टाळी वाजते येथे हजारांसारखी

धबधबा नाही तसा गोंगाटही नाही जिथे
खेळवूया या तिथे प्रतिभा तुषारांसारखी

एककल्ली, एकसूत्री बंधने टाळू जरा
दाद देऊ मुक्तकंठाने उदारांसारखी

तोच तो आशय नसावा यंत्रवत् कविता नको
विविधता ठेवू - नको वृत्ती सुमारांसारखी 

गोठवावी वेदना जखमेतली माझ्या जुन्या
शायरी त्यातून यावी तीक्ष्ण वारांसारखी

पाहिली ज्यांनी व्यथा त्यांनाच उत्सव पाहु दे
चेतना नाही दुजी उमद्या विचारांसारखी

- निलेश पंडित
१८ मे २०१४