स्वप्नांचे अस्तित्व । चिरंतन सत्य
स्वप्ने सर्व नित्य । पाहू या हो ।।
वाढवू या सारा । स्वप्न सत्य गुंता
दूर होई चिंता । नशेवाटे ।।
तर्कहीनतेचे । फुटूनिया पेव
व्यर्थ उठाठेव । बरी वाटे ।।
सर्वांगी सात्विक । स्वप्न विके कोणी
मिळे त्यास लोणी । ताक आम्हां ।।
दुधाची गरज । ताकाने भागवू
अधिक भिनवू । स्वप्ने अंगी ।।
ज्यांच्या नशिबात । ताकसुद्धा नाही
त्यांची चिंता वाही । भगवंत ।।
दिवसागणिक । संख्या वाढे त्यांची
ही का विक्रेत्यांची । चूक आहे?
आपण करावी । स्वप्नात मुजोरी
जगण्या शिदोरी । स्वप्नांचीच ।।
देवा मायबापा । उघडो ना डोळा
आमचा हा चाळा । चालताना ।।
स्वप्नांच्या नशेत। जगावे मरावे
नशेत बघावे । फक्त स्वप्न ।।
- निलेश पंडित
१५ जून २०१४
कोणत्याही टिप्पण्या नाहीत:
टिप्पणी पोस्ट करा