रस्ता

भरकटावे नेमके मी का असा चुकवून रस्ता
त्यातही तो मीच आधी नेहमी बनवून रस्ता

दूर मी गेलो तिच्यापासून नकळत खूप वर्षे
चाललो मी थांबली पण ती मला सुचवून रस्ता

एकमेका शोधताना दूरवर आलो तरीही
भेटलो नाही कसे ... चुकलो कसे ... ठरवून रस्ता

रोषणाई आपल्या कित्येक स्वप्नांची दुतर्फा
भव्य माझी अंत्ययात्रा शेवटी सजवून रस्ता

चाललो मी आणि रस्ता सरळ होता हेच चुकले
साधते लोकांस सारे नेहमी वळवून रस्ता

'पंडिता'ला एकटा सोडून ती गेली सुखाने
आठवण पण आजही असते तिची अडवून रस्ता

- निलेश पंडित
२२ डिसेंबर २०१४