अश्मयुग

मोहावर मोह । मोहाखाली मोह 

मोहाचाच डोह । खोल खोल ।। 

 

मोहाचे वास्तव्य । सदैव अंतरी 

मात्र मुखावरी । संन्यस्तत्व ।। 

 

तर्क अनुमान । असा शुद्ध आव 

अंतरात भाव । अहंतेचा ।। 

 

स्वत्वाचा मुलामा । आत अहंकार 

त्यागाला किनार । धूर्ततेची ।। 

 

सोयिस्कर तेव्हा । मानव्याची मूल्ये 

 ह्रदयात शल्ये । अतृप्तीची ।। 

 

 सभ्यतेचा वेष । जणू कुणी घाले 

आत दडलेले । जनावर ।। 

 

अशी खरोखर । संस्कृती प्राचीन 

 पोटी बाळगून । अश्मयुग ।। 

 

- निलेश पंडित 

२८ डिसेंबर २०१४