चूक

(वृत्त: चामर)

विझविलेस तू हवे इथे तिथे किती दिवे
करून बघ प्रयत्न चेतवावयासही नवे

टाळलेस तू मला असेलही खरे कधी
टाळलीस का खरेच मात्र सर्व आसवे

मांडला हिशेब तोडली समस्त बंधने
सोडले तिने तसेच का तिचे जुने दुवे

घार एकटीच हिंडते नभात नेहमी
कावळ्या नि पारव्यास मात्र लागती थवे

चूक फक्त एक मौन पाळले नको तिथे
आणि आज स्वप्न फोल व्यर्थ सर्व आर्जवे

- निलेश पंडित
३० मे २०१५

(पहिल्या शेरातला खयाल माझा नाही … एक हिंदी शेर वाचनात आला त्यातला … पण मूळ शायर दुर्दैवाने माहित नाही.)