सामान्य

माणसे सामान्य । माझ्यासारखीच
कोडी आगळीच । घालतात ।।

नसे अपवाद । माझाही तयांत
एकच जमात । सामान्यांची ।।

साधेसुधे सुख । सुखासुखी येता
न ये त्याची चिंता । करतात ।।

नवी यंत्रे तंत्रे । वापरती जरी
जुन्यासाठी तरी । शोकमग्न ।।

आधुनिकतेच्या । स्पर्शात जगती
मात्र प्रशंसती । प्राचीनता ।।

अभिनंदनाचा । शब्द प्राप्त होता
घोर रडकथा । रंगविती ।।

कष्ट कसे केव्हा । माथी आले त्यांच्या
गोष्टी सा-या त्याच्या । ऐकविती ।।

दिसे कोणी जेव्हा । आनंदी नेहमी
"अधिक सुखी मी" । सांगतात ।।

किंवा "अशी संधी ... । ... नव्हती आम्हांस"
म्हणुनी उदास । होत जाती ।।

वेगळेपणाचा । संतत हव्यास
जोखीम तयांस । मात्र नको ।।

तर्कशुद्धतेच्या । आभासी जगती
मनी जोपासती । आशावाद ।।

निराधार आशा । डोळ्यांस झापडे
ह्यांत त्यां सापडे । समाधान ।।

पडता ही कोडी । प्रश्न माझा मीच
मनास माझ्याच । विचारला ।।

स्वबलावाचून । काय वेळी अशा
जगण्यास दिशा । पुरवी जे ।।

कृतीशील जो जो । मध्यमवर्गीय
तयापाशी काय । आशेविना ।।

स्वत:चे स्वत:च । जिणे अंतर्बाह्य
सदैव सुसह्य । करतात ।।

प्रार्थनेने माझ्या । मलाच स्फुरण
आशेचे तोरण । तसे मना ।।

कधी न सुटावी । अशी काही कोडी
राहू द्यावी थोडी । आयुष्यात ।।


- निलेश पंडित
१२ जुलै २०१५