वंद्य

(वृत्त: भुजंगप्रयात)

उन्हे लुप्त झाली तशी सांज आली
पहा सूर्य अस्ताचला चालताहे
नभाच्या कडा स्वर्णरंगी परंतू
पुन्हा कृष्णछाया पुढे येत आहे

त्वरे राज्य प्रस्थापिते शांतता अन्
मनी दाटते गूढता गोठणारी
दिवे चार भिंतींमधे तेवताना
तमाच्या पखाली जगी ओतणारी

कुठे दीपमाला कुठे रोषणाई
कुठे दु:ख दाटून राहे सभोती
परी दु:ख जेथे तिथे एकट्याशा
सुखाने भल्या तेवती वंद्य ज्योती

अशा दिव्य ज्योतीच आधार देती
तमातून विश्वा उजेडात नेती


- निलेश पंडित
१४ ऑक्टोबर २०१५


(एका काव्यप्रेमी समूहात अनुकरणावर आधारीत खेळात भारती बिर्जे डिग्गीकर ह्या निष्णात कवयित्रीच्या शैलीचं अनुकरण करण्याच्या प्रयत्नातून लिहिली गेलेली कविता.)