ताबा

इतक्या वर्षांनंतर
बरंच काही
बदलूनही
जणू नाहीच बदललं काही
अशीच करारी, जबाबदार
होतीस तू

आपलं अचानक
कुठल्याशा कार्यक्रमात भेटणंही
जणू आयुष्याच्या
इतर सर्व अव्ययांप्रमाणेच
असावं नियंत्रणात तुझ्या
(आणि
कधी मीही हवा होतो जसा)
तसं होतंही कदाचित्

ताठ मान
कधी न न पाहिलेल्या
श्रीमंतीचा रुबाब
नवऱ्याचा टाय मधेच
त्यालाही जाणीव होण्याआधीच
झपाट्यानं नीट करण्याची ढब
सर्व उमरावांमधे वावरण्याची
सफाईदार पद्धत

फक्त
चुकार पाखरासारखी
अचानक तुझा ताबा
सोडून धावणारी नजर
आणि त्या नजरेला
लगडलेलं
तेच जुनं मन
वगळता


- निलेश पंडित
२७ जून २०१६