विहार

शब्दरचनेत । बाहेर शब्दार्थ
आत गर्भितार्थ । लेखकाचा

त्याही खाली वसे । सुप्त मथितार्थ
केवळ जो सार्थ । वाचकाला

स्तरास्तरांचे हे । संवादांचे अंग
सर्व मनरंग । विघटित

हास्य वरवर । काळजात कळ
मनी वळवळ । कीटकांची

कीटकांचा नाश । करण्याची त्यात
धडपड आत । चालतसे

मंत्र जपजाप्य । नाम मौन काही
योग प्रयोगही । रोज नवे

जरी बदलली । रोज खळखळ
निव्वळ उथळ । तेच पाणी

दिसायला दार । बंद वा उघडे
थोडीशी कवाडे । बाहेरून

मात्र दालनात । कित्येक दालने
चिरे नवे जुने । बांधतात

आयुष्याची साल । रोज वरवर
सोलूनही गर । हाता न ये

थोडे मागे जाता । मारताना सूर
खोली पुरेपूर । दिसू लागे

विहार करता । खोलवर तीत
गर नि सालात । भेद नुरे


- निलेश पंडित
५ फेब्रुवारी २०१७