निष्प्राण

नसतीस तू जगण्यात तर जगलो तसा असतो खरा
हे लिहित असताना कसा बघ हात झाला कापरा

ज्या ज्या ठिकाणी तू कधी वसलीस ते आता रिते
मी मात्र तेथे आजही दुसऱ्या कुणा ना आसरा

तू कोण अन् मी कोण ते सांगू कसे मी नेमके
काया प्रफुल्लित तू नि मी निष्प्राण केवळ चेहरा

वाटायची थंडी गुलाबी तू निकट असता मला
होताच मग मी एकटा झाला हिवाळा बोचरा

तेव्हा जवळ दिसताच तू उजळून रात्री यायच्या
निस्तेज आता दिवस असतो सूर्य निव्वळ पांढरा

होती गती होती नशा जगण्यात माझ्या नेहमी
माझा तरी माझ्या कधी हातात नव्हता कासरा


- निलेश पंडित
२२ जुलै २०१७