पैलूपैलूमागे । उणिवांचा साठा
उगाच का ताठा । जगण्यात
पाहताना एक । समजते दुजे
अंतरात खुजे । प्रतिबिंब
प्रतिबिंबास त्या । समजता सत्य
वाटे लाभे नित्य । परिपूर्ती
परिपूर्ती खरी । अनुभवा येते
मात्र ती टिकते । अल्पकाळ
जशी परिपूर्ती । तसाच आघात
चिरंतन त्यात । नसे काही
दिसताच टिंबे । रेषा भासतात
आत वसतात । पोकळ्याही
अर्थामागे व्यर्थ । दडतेच काही
समाधानालाही । ग्रासे व्यथा
शाश्वत वा स्थिर । असंभव जेव्हा
दृष्टी का न तेव्हा । बदलावी
बदल नि वेग । हाच मंत्र व्हावा
रोजच पहावा । नवा सूर्य
सक्तीची विरक्ती । कधी न मुरावी
अंगी बाणवावी । अनुरक्ती
कशास ही चिंता । सत्य वा आभास
सरता प्रवास । सौंदर्यात
- निलेश पंडित
१४ आॅक्टोबर २०१७
कोणत्याही टिप्पण्या नाहीत:
टिप्पणी पोस्ट करा