हव्यास

शाई हा द्रव वेगळाच
रक्त, घाम, अश्रू
ह्यांहून
तशीच वेगळी जाणीव
अवलोकनातून आलेली
अनुभूतीतून जन्मलेल्या
अस्सल संवेदनेहून

बघणं, मांडणं, चितारणं
अठराविश्वे दारिद्र्य
रंगवणं उद्रेक
नटवणं दु:खिता शोषिताचा चेहरा
वातानुकुलित स्वच्छ आडोसा
सांभाळून
आणि तेच
पण वेदना हृदयाच्या मुळाशी
सोसून पोसून जोपासून
ह्यात तफावत
जमीनअस्मानाची

हे समर्थपणे
त्याच्याही नकळत लिहिणाऱ्या
स्वत:च्याच अनुभूतीच्या
स्वत:नेच केलेल्या
अवलोकनातून फुललेल्या
त्या कुण्या अज्ञात आगंतुक कवीच्या
लेखणीचा खोल घाव
जेव्हा झाला माझ्या मनावर
एकदाच पण नेमका

तेव्हापासून फसफसून भडभडून
विसर्जित करावंसं वाटतं
फोलपण
अक्षर-शब्दांच्या
चौकटी चौकटीतल्या
नक्षीदार कंगोऱ्यांचं
ज्यांना समजलो कधी मी
सौंदर्य, मूल्य वगैरे

... आणि निर्माण होणाऱ्या रिक्ततेत
रुजवावी निर्भेळ जाणीव
जिला नसावा मुलामा
अभिव्यक्तीच्या हव्यासाचा


- निलेश पंडित
२६ नोव्हेंबर २०१७