हा ब्लॉग शोधा

शुक्रवार, १६ फेब्रुवारी, २०१८

दाह

लगबगीने टाळ वा रंगून रेंगाळून जा
भेटताना टाळताना मात्र पडताळून जा

एकदा मनसोक्त भर काया सुगंधाने जरा
पाकळी अन् पाकळीने फूल चुरगाळून जा

नेहमी मी दाह वा भडका तरी सोसू किती
मोकळे सर्वांग कर पुरते मला जाळून जा

लोकलज्जेने किती वहिवाट घुसमट ही इथे
धाडसाची वाटही जगण्यात चोखाळून जा

आक्रमक मीही अचानक एकदा होईन बघ
त्या क्षणी तूही बदल लाजून ओशाळून जा

विखुरलो तुटलो नि जगलो थंड रक्ताने पुढे
दोन क्षण जुळवू पुन्हा आजन्म वाफाळून जा


- निलेश पंडित
१६ फेब्रुवारी २०१८

कोणत्याही टिप्पण्‍या नाहीत:

टिप्पणी पोस्ट करा