धुरळा

(वृत्त:  शिखरिणी)

धरेला तेजाने नित सजविती सूर्यकिरणे
अनादी उर्जेची अपरिमितशी दिव्य सुमने
... कधी अस्तित्वाने सुफल करती जेथ पडती
अभावाने केव्हा प्रसवित तमा ग्रासत मने

विषारी वल्लींची अविरत प्रजा भूवर फळे
विखाराच्या पोटी खल कृपणताही खळबळे
... दुराचाराचाही अनुभव दडे सर्व जगती
मनादेहासंगे कुरुप पशुता, क्रौर्य उसळे

कुणा पुण्यात्म्याचे स्मरण करता विश्व समजे
सदाचारायोगे नकळत जगी मोल उमजे
... समाधी वाटावे सहज अवघे जीवन जणू
अशी कर्तृत्वाची परम प्रतिमा त्यात निपजे

असामान्यत्वाचे सकल नमुने मात्र विरळा
प्रकाशाची माया वरवर वसे आत धुरळा


- निलेश पंडित
७ जून २०१८