अर्थवाही

हिंस्त्र जलचर खोलवर सगळीकडे दडतात काही
राजकारण नेमके डावे व उजवे असत नाही

सावल्या मोठ्या तशा प्रतिमा बड्या करते प्रसिद्धी
मात्र देतो श्वापदांची आतल्या इतिहास ग्वाही

खूप मोठ्या संस्कृतीच्या गौरवास्पद थोर गाथा
पण नकाशा वा गती गंतव्य वा नसते दिशाही

सत्य ज्यांनी लपविले ते शेवटी सत्तेस मुकले
फक्त खोटे बोलण्याची लागते अंगी कलाही

ती अनर्थाचेच क्षण आयुष्यभर जगली व गेली
कारणाने ह्या तिची कविता असावी अर्थवाही


- निलेश पंडित
१९ आॅक्टोबर २०१८