बदल

(वृत्त: मदनरंग)

पारखून मन माझे मी संतत मांडले
तेच जरी शब्द अर्थ भाव जाणिवेतले
... रूपवेध वेगवेगळा हरेक भासता
आकळेन पूर्ण मी ... मला सदैव वाटले

सापडलो जितका तितकाच गूढ मात्र मी
टाकतो स्वत:स नित्य नवनवीन संभ्रमी
... गवसताच गोंधळतो ... दोन्ही एका क्षणी
रुक्ष खरबरीत कधी आणि कधी रेशमी

मीच नव्हे सर्व मला मात्र ह्यात जग कळे
भलाबुरा अंश स्वत:चाच जणू आढळे
... भले अंश हे सारे फक्त मीच जाणतो
विश्वच अवघे मनात उगवे अन् मावळे

पारखून मांडण्यात हरवतो व गवसतो
अंश अंश मी मलाच अन् जगास बदलतो


- निलेश पंडित
२२ आॅक्टोबर २०१८