चिकित्सा

मार्ग थोरांचा कुणी चोखाळणे अत्यंत विरळा
सहज जमते चौथऱ्यावर बांधणे निर्जीव पुतळा

वर्णने इतिहास देतो राजहंसाच्या रुपाची
तोच पूर्वज आमचा म्हणण्यास असतो सज्ज बगळा

भेटताना शेवटी नजरानजर होती नकोशी
आजही अवघड क्षणी गेला तुझ्या डोळ्यांत धुरळा

कोण मेले कोण जगले कोण जखमी पाहिले मी
हे तसे दुय्यम महत्त्वाचा पुरेसा उग्र मथळा

खूप सोपी धोरणे संवाद येथे साधण्याची
जे हवे ते बोलणाऱ्यावर इथे विश्वास सगळा

कोणत्याही कूट प्रश्नाची सहज टाळा चिकित्सा
देशभक्ती त्यात मिसळा आणि मग भरपूर उकळा


- निलेश पंडित
९ नोव्हेंबर २०१८