पायाखाली वाळू | जाते सरकत
वारा घोंगावत | खुणावतो ||
निर्मितो मी माझा | पायांखाली ठसा
ज्याचा भरवसा | क्षणकाल ||
येतात जातात | छोट्यामोठ्या लाटा
दूरवर छटा | सूर्यास्ताच्या ||
तळपायाखाली | विरतात तसे
लाटांमध्ये ठसे | हळूवार ||
लोक भोवताली | दूर पांगलेले
परके आपले | दिसतात ||
अमर्याद व्याप्ती | जे जे दिसे त्याची
छाती माणसाची | दडपते ||
मंदावता गती | नौका परतती
काही तरंगती | किनाऱ्याशी ||
मिणमिणतात | तारकांचे दिवे
पाखरांचे थवे | शांत होती ||
गर्द काळा साचे | सर्वत्र अंधार
सोडूनी थरार | जाणिवेत ||
शांततेत दिसे | अनामशी दिशा
रुजवीत आशा | प्रकाशाची ||
- निलेश पंडित
३० जुलै २०१९
कोणत्याही टिप्पण्या नाहीत:
टिप्पणी पोस्ट करा