सुसूत्रता

असते सुसूत्रता ... जगरहाटी
असंच असतं सारं ... ते कसं बदलणार?
पण काहीतरी बदल करायलाच हवा

मनातला सुप्त पशू
आणि उत्क्रांत मानव
दोन्ही एकाच वेळी सांभाळत
मी ठरवत जातो
बरंवाईट ...
... नकळत ...


निर्णय देतो वेगवेगळे
झालं ते योग्यच की अयोग्य
ह्याहून वाईट कसं घडलं असतं
किंवा कसं चांगलं
हे सांगत असतो
माझ्यातील पशू कधी ... कधी मानव
सलगी कशाशी, कुणाशी
सुप्त प्रेरणा पाशवी की मानवी
त्यावरून .... नकळतच

मग कर्ता करविता पाहून मी देतो न्याय
चतुराई की लबाडी
नाकर्तेपणा की संयम
खोटेपणा की राजनीती
भ्रष्टता की अगतिकता
इतिहास महत्त्वाचा की वर्तमान
अप्पलपोटेपणा की व्यवहार
मालक की कुत्रा
गरज की हव्यास
खराब व कारणीभूत माणूस की परिस्थिती
... अशा असंख्य पैलूंवर
लावतो आंदोलनांची टोकं असावीत
तशी लेबलं
माझ्या सोयीनं
माझ्या नकळत ...
कण्हत म्हणत ...

"असंच असतं सारं ... ते कसं बदलणार?
पण काहीतरी बदल करायलाच हवा"


- निलेश पंडित
१५ आॅगस्ट २०१९