दुय्यम

 वृत्त: मदनरंग

नरमादी ठळक सत्य अन् तशीच संतती

मायबाप पुत्रपौत्र कल्पनेत उतरती

... दगड स्पष्ट नैसर्गिक कोरण्यास आयुधे

शिल्पकार त्यातूनच कल्पशिल्प कोरती

चितारता कल्पनाच सत्य बने चित्र ते

अंशरूप घेत कल्पना खऱ्यात मावते

... मानवी मनात बीजरूप फक्त जी असे

मानवास ... मग मनास ... मग जगास व्यापते

जग झाले गडद गूढ मिश्रण फोफावता

सत्यासत्यात फरक उमजेना मिसळता

... मानव दुय्यम झाला देश, धर्म माजले

भीतीचे साम्राज्य नि बुद्धीची सांगता

बुद्धीने सहज सुखद स्वप्ने जी प्रसवली

स्वप्नांनी त्याच तिची कबर थेट खोदली

- निलेश पंडित

२९ डिसेंबर २०२०