जाण

 (वृत्त: भूपती)

मोहक स्वप्नांची रुंजी मनात चाले

वहिवाटीचे देहाच्या विश्व निराळे

... दोहोंच्या परस्परांशी अगम्य गाठी

आयुष्य खोलवर ह्यातच गुरफटलेले

क्षण पुढील वाटे नव्या दिशेची ग्वाही

स्थैर्याचा क्षणही जुना सोडवत नाही

... जन्मती व विरती भ्रमात सारी स्वप्ने

उमलून फुले जे ते कोमेजत जाई

हे उमजे पण स्वीकार न होतो ह्याचा

आपल्या जगाचा कपोलकल्पित साचा

... चाचपतो अन् मानतो हवा तो जो तो

अमृत वरवर अन् तळात गाळ विषाचा

दूरस्थपणे हे मनास सारे कळते

टाळून जाण ही मन जगण्यातच रुळते

- निलेश पंडित

३१ मे २०२१