किमया

 

सळसळते काही सुरम्य अवतीभवती

बंधन चाकोरीतील खुणावे मागे

मी मुक्त भरारीसाठी आतुरलेला

जखडता मला कसलेसे अतूट धागे

अस्वस्थपणा धडपड त्रासिकता सारी

जाचती ग्रासती शरीर आणि मनाला

थैमान घालती विचार स्वप्ने दोन्ही

शृंखला बने रेशमी मुलायम माला

हा प्रवाहपतितांचा अव्याहत ओघ

मोहून सदोदित वंचितही असण्याचा

आनंदासाठी दुःखाचा मागोवा

हा रिवाज तृप्तीसाठी आसुसण्याचा

माफक स्पर्शाची अन् दृष्टीची किमया

एकाच क्षणी आयुष्य व्यापते माया

- निलेश पंडित

१६ जुलै २०२४