हुलकावणी

 

मनापासून थोडे वेगळे वागायचे होते

मला माझ्या मनाचे सांगणे ऐकायचे होते

जरी मी चारचौघांसारखा होतो समाधानी

मला तू सोसलेले दुःखही सोसायचे होते

कधी जर भेटलो नसतोच तर झाले बरे असते

असो हे व्हायचे होते जसे ते व्हायचे होते

सदोदित येत वरचेवर पुन्हा स्वप्नात ती गेली  

तिला जाऊनही माझ्याकडे परतायचे होते 

मनाच्या मत्त वारूने उधळणे सोडले नाही

जरासे थांबणे अन् चालणे जमवायचे होते

दिली हुलकावणी प्रत्येक टप्प्यावर मला त्याने 

नशीबाला जणू काहीतरी सुचवायचे होते

- निलेश पंडित 

२९ मार्च २०२५