व्यर्थ

थांबवली ... शब्दांची व्यर्थ देवाणघेवाण.

तर्कानुमानाचा बुरखा पांघरून
दिसलं वावरताना द्वय
कल्पनाविलास आणि भावना ह्यांचं

काय आहे ह्याची जाणीव
अनपेक्षितपणे बदलताच
जरतर असेलनसेलचे
इमले बांधले जाताना पाहिले

जाणवला
त्या इमल्यांचा पाया
वर्षानुवर्षे घडलेला
घट्ट कडक टणक अभेद्य
भावनिकतेचा

बघितली
नैसर्गिकता आणि पशूता
तथाकथित उत्क्रांती आणि सुबुद्धता
ही पात्रं
बदलत्या गरजू गिऱ्हाइकांसमोर
सामाजिक कुंटणखान्यांमध्ये
शक्तीशाली क्रूर
निर्लज्ज भडव्यांच्या
हातातल्या बाहुल्या बनून
योग्यायोग्यतेच्या आणि औचित्यानौचित्याच्या
नटव्या व्याख्यांचे
लेप थापून
रंगरंगोटी करत बसलेली
स्वतःच्या चेहर्‍यांवर


अनुभवला
असत्य क्रौर्य भ्रष्टता
अन्याय हिंसा अनैतिकता
मुस्कटदाबी गुन्हेगारी दडपशाही
ह्यांचा प्रादुर्भाव कमी करण्यासाठी
त्यांनाच समजावं साधन व
करावा त्यांचा वापर अधिकच ...
... तोही अधिक खुनशीपणाने ...
असा अनाकलनीय बुद्धीभ्रंश
जागोजागी
पुन्हापुन्हा

... जोखलं हे सारंच
त्यापासून
सुरक्षित अंतर ठेवणार्‍यांबरोबर
सुरक्षित अंतर ठेवून

म्हणूनच
थांबवली शब्दांची व्यर्थ देवाणघेवाण
मी माझी माझ्याबरोबरही



- निलेश पंडित
५ जून २०२०