हा ब्लॉग शोधा

शुक्रवार, २८ ऑगस्ट, २०२०

सूत्रधार


पावलोपावली क्षणोक्षणी

प्रत्येक आयुष्याला

काठोकाठ स्पर्श करत

सर्व जिवांचं

प्रत्यक्ष अप्रत्यक्ष नियंत्रण

करत असतो

निश्चितच 

कुणी 

हाडामांसारक्ताचा

खराखुरा

अदृश्य सूत्रधार

सर्वत्र


वावरत तुमच्या आमच्या सर्वांच्या 

दैनंदिन जगण्यातच

आपल्या नकळत


जो देतो रंगांना धर्म

धर्मांना रंग

भगवा हिरवा आणि इतरही

भाषांना भूगोल

प्रदेशाला अस्मिता

अस्मितेला प्रदेश


जागवतो

वर्णाची जाणीव

जाणिवेचा वर्ण

फडकवतो बावटे, झेंडे

लाल काळे रंगीबेरंगीही


... आणि स्वतः नांदत

ऐषोआरामात

नेमतो ...

पिढ्यान् पिढ्या

भीती अबाधित राखण्यासाठी

तथाकथित धर्म-देव-गंडस्थानांमध्ये

कपोलकल्पित कुठलासा

अदृश्य सूत्रधारही




- निलेश पंडित

२९ आॅगस्ट २०२०


कोणत्याही टिप्पण्‍या नाहीत:

टिप्पणी पोस्ट करा