थोर वाक्चातुर्य, भाषा नेमकी अन् गोड आहे
मात्र ह्याला खूप खोटे बोलण्याची खोड आहे
लाख कोटींचेच असते नेहमी पॅकेज ह्याचे
आपल्या जनतेकडे पण फक्त फुटकळ मोड आहे
वृत्तपत्रे छापती बोफोर्स अन् राफेल येथे
आणि जनतेच्या नशीबी रोज तंगडतोड आहे
वाटते मिळतो विचारांती बदल मोठा प्रजेला
शेवटी कळते खरे तर स्वप्न अन् धरसोड आहे
जो विरोधी तो निकामी, व्यर्थ त्याची योजनाही
आणि ह्याची चूक ती युक्ती म्हणे बिनतोड आहे
मागल्यांनी कैक वर्षे खूप भ्रष्टाचार केला
अन् नव्यांच्या भ्रष्टतेला दहशतीची जोड आहे
- निलेश पंडित
१५ मार्च २०२१
कोणत्याही टिप्पण्या नाहीत:
टिप्पणी पोस्ट करा