वर्तुळ

 

मनात माझ्या धुके दाटता

ताल आतआतला डळमळे

गूढ अनामिक कसलेसे भय

भरे जुन्या ह्रदयात कोवळे

ठळक गूढ अज्ञात अनिश्चित

सतत जन्मता नवीन काही

तीचतीच ती दशा ... दिशाही

परंतु नसणे कधीच नाही

समतोलाचा प्रयास वरवर

मन लज्जित अथवा अभिमानी

केव्हा आनंदाचे भरते

कधी वेदना तीव्र तुफानी

अतर्क्य माझे विचित्र जग मी

माझ्यातच वसवून तोडतो

त्राग्याने झिडकारता कधी

सावरता जवळही ओढतो

बहुरंगी जग कित्येकांचे

त्यात रोज मी मिसळत जातो

कृष्णधवल दोनच रंगांच्या

विभागणीची शिकस्त करतो!

... धूसर जे ते स्पष्ट दिसावे

जसे जिथे नाही ते व्हावे

ह्या हट्टातच शोधत जातो

वर्तुळात मी उजवे डावे

- निलेश पंडित

३१ जानेवारी २०२२